Prydleswyr

Beth yw Tâl Gwasanaeth?

Tâl am wasanaeth yw eich rhan chi o’r costau am y gwasanaethau rydym yn eu darparu yn eich bloc a/neu stad. Mae posib adennill y taliadau o dan delerau eich prydles a rhaid iddo gael ei dalu gennych chi, y prydleswr.

Bydd anfonebau tâl am wasanaeth yn cael eu cyfrifo ar sail amcangyfrif ar gyfer y flwyddyn gydag addasiad yn cael ei wneud ar gyfer y gwahaniaeth rhwng cost oedd wedi ei amcangyfrif ar gyfer y flwyddyn flaenorol a’r gwir gost.

Mae’r gwasanaethau y byddwch yn talu amdanynt yn ddibynnol ar leoliad eich eiddo a’r gwasanaethau sydd ar gael yn yr adeilad.

Mae’r gwasanaethau y gallwn godi tâl amdanynt a’r rhan y gallwn godi amdano wedi eu hamlinellu yn eich prydles.

Disgrifiad o Dâl am Wasanaeth

Dyma enghreifftiau gwahanol o dâl am wasanaeth a all ymddangos ar eich anfoneb. Nid yw’r rhain ar bob safle. Dylech fod yn ymwybodol o ba wasanaethau sydd ar eich safle chi.

• yswiriant yr adeilad
• gwasanaethau glanhau
• trydan
• torri glaswellt a chynnal a chadw tir
• rheoli diogelwch stad

Os ydych yn cael y gwasanaethau uchod ac yn anhapus am unrhyw reswm, cysylltwch gyda ni i drafod eich pryderon.

Cynnal a Chadw

Efallai y bydd tâl am wasanaeth cynnal a chadw ar eich anfoneb. Mae hwn yn amrywio a chaiff ei gyfrifo yn unol â chostau’r gwaith trwsio sydd wedi ei wneud i’r bloc neu fan cyffredin.

Gallwn ad-ennill costau cynnal a chadw o dan delerau’r brydles. Cyfeiriwch at eich prydles am fwy o fanylion.

Fel prydleswr, bydd yr wybodaeth berthnasol am ofyn caniatâd i wneud gwelliannau neu addasiadau i’ch cartref yn cael ei amlinellu yn eich prydles. Ni fydd pob prydles yn caniatáu gwelliannau ac addasiadau, a pan fydd caniatâd yn bodoli bydd angen i chi gael caniatâd gan Adra.

Gwelliannau ac addasiadau bychain

Yn gyffredinol, ni fydd angen i brydleswyr ofyn am ganiatâd i wneud gwelliannau bychain fel addurno, rhoi silffoedd neu luniau ar waliau ac ati.

Gwelliannau ac addasiadau mawr

Pan fo’r brydles yn caniatáu i rywun wneud gwelliannau ac addasiadau, rhaid i chi wneud yn siŵr eich bod chi yn y lle cyntaf yn cael caniatâd ysgrifenedig gan Adra cyn gwneud unrhyw waith gwella neu addasiadau mawr i’ch cartref.

Bydd angen i chi gwblhau ffurflen ac unwaith bydd y ffurflen wedi ei chyflwyno, bydd eich cais a phrydles yn cael eu hadolygu a byddwn yn gadael chi wybod beth yw’r penderfyniad.

Gwaith sylweddol yw’r term sy’n cael ei ddefnyddio lle bydd gwaith i floc yn costio mwy na £250. Mewn rhai achosion, gall y costau fod yn uwch.

Gall hyn fod yn waith sydd angen ei wneud er mwyn cynnal a chadw’r eiddo. Lle mae’r gwaith sylweddol yn cyrraedd y trothwy ariannol sefydlog, byddwn yn ymgynghori efo chi a bydd angen i chi gyfrannu at y costau hyn yn unol â thelerau eich prydles.

Gall gwaith sylweddol gynnwys:

• gwaith toi
• man cyffredin
• gwaith brics allanol neu waith blociau
• soffits
• ffasgau
• gwaith gwter

Pryd byddaf yn cael anfoneb am y gwaith?

Byddwch yn cael anfoneb am gost y gwaith ar ôl cwblhau’r gwaith ac wedi i’r cyfrifon terfynol gael eu hadolygu. Mewn rhai amgylchiadau, efallai y byddwn yn dymuno gyrru anfoneb cyn i’r gwaith ddod i ben e.e. prosiectau hirach na 12 mis.

Byddwch yn cael anfoneb am waith sylweddol a llythyr eglurhaol a chopi o grynodeb o’ch hawliau a goblygiadau, dadansoddiad o’r costau a chopi o’r opsiynau talu.

Os bydd angen addasu’r anfoneb am unrhyw reswm, byddwch yn cael anfoneb wedi ei adolygu neu nodyn credyd.

Pryd fydd disgwyl i mi dalu am y gwaith yma?

Ar ôl i chi gael yr anfoneb, bydd disgwyl i chi gysylltu efo ni a threfnu taliad o fewn 30 diwrnod o’r anfoneb. Bydd aelod o’r Adran Gyllid ar gael i drafod manylion opsiynau talu amrywiol sydd ar gael.

Talu eich anfoneb

Trefnwch i dalu’r anfoneb o fewn 30 diwrnod o’i dderbyn.

Dyma’r opsiynau talu sydd ar gael:

• taliad llawn o fewn 30 diwrnod – Bydd Prydleswyr sy’n talu’r swm yn llawn o fewn 30 diwrnod o’r anfoneb (yn ddibynnol ar nad oes ganddynt ôl-ddyledion ar eu Cyfrif Tâl am Wasanaeth arferol) yn cael lleihad o 5% yn y gost
• taliad llawn o fewn 12 mis – Gall cyfanswm cost y gwaith gael ei rannu ar draws 12 mis heb log (nid yw’n cynnwys 5% o leihad yn y gost)
• benthyciadau Gorfodol Gwaith Sylweddol – Efallai y bydd Prydleswyr yn gymwys i gael benthyciad gan Lywodraeth Cymru er mwyn eu cynorthwyo i dalu biliau mawr am Dâl Gwasanaeth. Os yw prydleswyr yn cwrdd â’r amodau cymhwyso, byddwn yn dweud wrthynt am eu hawl i gael benthyciad a bydd yn cyfeirio prydleswyr at Lywodraeth Cymru
• prynu’n ôl – Bydd prynu eiddo ar brydles yn ôl yn cael ei wneud wrth ein disgresiwn. Bydd pob achos yn cael ei ystyried yn unigol. Bydd rhan y Prydleswyr o’r Gwaith Sylweddol yn cael ei dynnu o bris sy’n cael ei gytuno wrth werthu, yn ogystal a unrhyw ôl-ddyled ad-daladwy neu tâl am wasanaeth.

Sut dwi’n talu?

Gallwch dalu eich anfoneb drwy:

• creu archeb sefydlog yn y banc
• siec yn daladwy i Adra Tai Cyfyngedig
• talu mewn cangen Barclays
• trosglwyddiad banc ar-lein

Mae gan y ‘Leasehold Advisory Service’ llawer o wybodaeth sy’n ymwneud a Gwaith Sylweddol a’r broses Ymgynghori Adran 20.

Mwy o wybodaeth yma.