Adra yn cyhoeddi Prif Weithredwr newydd

Mae Adra, cymdeithas dai fwyaf Gogledd Cymru wedi penodi Prif Weithredwr newydd.

Iwan Trefor Jones fydd yn olynu Ffrancon Williams fydd yn gadael y mudiad ganol mis Mai ar ôl 13 mlynedd.

Mae Iwan wedi bod yn Ddirprwy Brif Weithredwr i Adra ers sawl blwyddyn ac mae ganddo brofiad helaeth o weithio mewn llywodraeth leol a’r sector tai, yn ogystal â bod yn gyn aelod o Fwrdd Uchelgais Gogledd Cymru lle cyfrannodd yn sylweddol at y gwaith o ddatblygu economi’r rhanbarth.

Dywedodd Hywel Eifion Jones, Cadeirydd Bwrdd Adra: “Mae gan Iwan weledigaeth glir, ymrwymiad ac angerdd i symud Adra ymlaen. Mae’n berson gwirioneddol ysbrydoledig sy’n adlewyrchu gwerthoedd Adra ac mae’n llysgennad gwych i’r sefydliad.

Dywedodd Ffrancon Williams, Prif Weithredwr: “Mae’n gyfnod heriol i’r sector tai yng Nghymru ac yn genedlaethol, ac Iwan yn sicr yw’r un i arwain y sefydliad i ddelio â’r heriau hynny. Mae ganddo brofiad helaeth o weithio yn y sector tai a bydd ei brofiad a’i arweiniad mewn llywodraeth leol a’r economi ranbarthol yn ei roi mewn sefyllfa dda ar gyfer y dyfodol”.

Ychwanegodd Iwan: “Rwy’n falch iawn o gael fy mhenodi’n Brif Weithredwr Adra. Bydd yn heriol dilyn yn ôl troed Ffrancon. Mae wedi gweithio’n galed iawn dros y blynyddoedd i arwain Adra ymlaen i’r sefyllfa hynod gadarn sy’n bodoli heddiw.

“Rwy’n edrych ymlaen at adeiladu ar yr holl waith da sydd wedi digwydd a byddaf yn sicrhau ein bod ni fel cwmni yn cadw at ein gwerthoedd wrth i ni ddatblygu i fod yn un o gwmnïau mwyaf blaengar Cymru. Edrychaf ymlaen at weithio gyda phartneriaid i ymateb i anghenion tenantiaid a chymunedau”.